रत्ननगर, वैशाख २६ । पूर्वी चितवनको रत्ननगर नगरपालिका–९, सिसै स्थित सिसै टोल विकास संस्थाले नयाँ कार्यसमिति (२०८३/०८५) गठन गर्दै नेतृत्वको जिम्मेवारी राम पौडेललाई अध्यक्षको रूपमा सुम्पिएको छ ।
अध्यक्ष पौडेलको नेतृत्वमा आज सम्पन्न टोल अधिवेशनले पुन अध्यक्ष रामुको नेतृत्वमा नयां कार्यसमिति चयन गरेको हो ।
उक्त समितिमा उपाध्यक्ष ठगना महत्तो, सचिव वेदनाथ रिमाल, सहसचिव सिता घिमिरे, कोषाध्यक्ष हेमा अधिकारी तथा सह–कोषाध्यक्ष सचिन आचार्य रहेका छन् ।
सदस्यहरूमा मिरा महत्तो, तारा पौडेल र प्रेम प्रसाद शर्मा रहेका छन् । सहभागितालाई केन्द्रमा राख्ने लक्ष्यसहित भएको यस चयनले सिसैमा नयाँ ऊर्जा थपिएको महसुस गरिएको छ ।
अध्यक्ष राम पौडेलले अबको कार्यकाललाई “सहकार्य र परिणाममुखी विकास” मा केन्द्रित गर्ने प्रतिबद्धता जनाएका छन् ।
टोलका समस्या समाधानदेखि पूर्वाधार सुधार, सरसफाइ, शिक्षा र सामाजिक सचेतनाका कार्यक्रमलाई प्राथमिकतामा राख्दै उनले सबै बासिन्दालाई एकताबद्ध भएर अघि बढ्न आह्वान गरेका छन् ।
कार्यक्रममा रत्ननगर नगरपालिका–९ का वडा अध्यक्ष अनन्त अधिकारी प्रमुख अतिथि तथा जिल्ला समन्वय समिति (जि.स.स) सदस्य सीता चौधरी विशिष्ट अतिथिका रूपमा उपस्थित थिए ।
नव–निर्वाचित अध्यक्ष राम पौडेलको नेतृत्वमा सिसै टोल विकास संस्थाले आगामी दिनमा टोलको समुन्नति र सामाजिक सशक्तीकरणतर्फ ठोस कदम चाल्ने अपेक्षा गरिएको छ ।
